Viðskipti innlent

Reitun hefur uppfært lánshæfismat á Arion banka hf.

Fanney Birna Jónsdóttir skrifar
Höskuldur Ólafsson, bankastjóri Arion banka.
Höskuldur Ólafsson, bankastjóri Arion banka. Vísir/Stefán
Mat Reitunar á lánshæfi Arion banka er i.BBB1 með jákvæðum horfum og lánshæfismat sértryggðra skuldabréfa bankans er i.AA2.

Lánshæfismatið er það sama og í júlí 2013 en einkunnaskali Reitunar hefur breyst. Nýja skalann má nálgast í skjali sem fylgir fréttinni. Lánshæfismat bankans og sértryggðra skuldabréfa hans verður uppfært í kjölfar birtingar á ársreikningi ársins 2013.


Í greiningu Reitunar kemur fram að bankinn sé langt kominn með að leysa úr vandamálum tengdum bankahruninu. Gæði lánasafnsins fara batnandi og fjárhagslegur styrkleiki bankans hefur aukist. Afkoma tengd kjarnastarfsemi er góð og samkeppnisstaðan sterk. Lok fjárhagslegar endurskipulagningar nokkurra stórra aðila, sem unnið hefur verið að, mun styrkja kennitölur. Gangi það eftir í samræmi við áætlun mun einkunn bankans hækka.


Sérstakar aðstæður á Íslandi, sem sagt gjaldeyrishöft, uppgjör við kröfuhafa og pólitísk óvissa, hafa neikvæð áhrif á alþjóðlegt lánshæfismat íslenskra aðila, þ.e. ríkissjóð, fyrirtæki og sveitarfélög. Þessar aðstæður munu því hafa neikvæð áhrif á kjör bankans á erlendum lánamörkuðum.
 
Framtíðarhorfur bankans eru góðar, þó íslenska hagkerfið sé sveiflukennt.


Mest lesið


Fleiri fréttir

Sjá meira


×

Mest lesið