Lánshæfismat ríkissjóðs hefur hækkað

„Með hækkandi sól hafa borist jákvæðar fréttir af lánshæfismati ríkissjóðs en síðastliðinn föstudag staðfesti Fitch Ratings lánshæfiseinkunnirnar BBB og segir horfurnar stöðugar.“ Þetta kemur fram í frétt frá Greiningardeild Arion banka.

Þá breytti Standard & Poor´s nýlega horfum úr neikvæðum í stöðugar. S&P rökstyður ákvörðun sína með því að dregið hefur úr áhættu í ríkisfjármálum. Þar er áætlað að heildarkostnaður ríkissjóðs vegna skuldaleiðréttingaraðgerða verði um sex prósent af vergri landsframleiðslu á næstu fjórum árum.

„Bætt lánshæfismat eru jákvæð tíðindi fyrir ríkissjóð og eru þá öll matsfyrirtækin með stöðugar horfur á langtímaskuldbindingar ríkissjóðs.“

Mat Fitch hefur farið hækkandi jafnt og þétt frá vori 2011. Moody´s og S&P hafa verið varfærnari með að hækka matið. „Síðustu ár hafa litast mikið af Icesave málinu og hafði það á sínum tíma áhrif á mat fyrirtækjanna. Jafnframt færði S&P horfurnar í neikvæðar sl. sumar þegar sérfræðingahópur um skuldavanda heimilanna var skipaður þar sem áhyggjur af ríkisfjármálum jukust, en nú liggur fyrir hver útfærslan verður á höfustólslækkun húsnæðislána og má telja það jákvætt skref að lánshæfismatsfyrirtækið hækki horfur í stöðugar í kjölfarið.“

Þá hefur áhættuálag á skuldbindingar ríkissjóðs hefur farið lækkandi. „Segja má að áhættuálag á erlendum skuldbindingum ríkissjóðs hafi þróast nokkurn veginn í takt við lánshæfismat ríkissjóðs, allavega ef litið er til hækkana á lánshæfismati Fitch, en áhættuálagið mælist sem vaxtamunur á íslensku og bandarísku ríkisskuldabréfi með gjalddaga 2016 og 2022.“

Álagið fór lækkandi frá fyrri hluta ársins 2012 eða stuttu eftir að Fitch hækkaði lánshæfismat sitt á langtímaskuldbindingar ríkissjóðs í BBB- eða úr ruslflokk í fjárfestingarflokk. „Eftir að útfærsla stjórnvalda á skuldaniðurfellingunni lá fyrir og ljóst var að áhrif á afkomu ríkissjóð yrði hverfandi eða engin má segja að áhættuálagið hafi byrjað að lækka aftur.“

Horfur í ríkisfjármálum og skýr ríkisfjármálaáætlun stjórnvalda til lengri tíma skiptir sköpum fyrir lánshæfimat ríkissjóðs og jafnframt aðgengi að fjármálamörkuðum.