Hagvöxtur verði meiri en síðustu 30 ár

Seðlabanki Íslands gerir ráð fyrir 3,7 prósenta hagvexti á næsta ári og 3 prósenta hagvexti árið 2016. Gangi spáin eftir verður hagvöxtur að meðaltali um 3,1 prósent á ári á spátímanum sem er meiri vöxtur en að meðaltali undanfarin þrjátíu ár og töluvert meiri vöxtur en spáð er í helstu viðskiptalöndum Íslands.

Þetta er meðal þess sem kemur fram í Peningamálum Seðlabanka Íslands sem bankinn birti í dag.

Þar segir að alþjóðlegar hagvaxtarhorfur hafi skánað frá útgáfu Peningamála í nóvember þótt óvissa sé áfram mikil, sérstaklega í tengslum við ágjöf sem nýmarkaðsríki hafa orðið yfir nýlega.

„Horfur um viðskiptakjör þjóðarbúsins hafa einnig batnað en útflutningshorfur hafa versnað, sérstaklega vegna lakari horfa um loðnuveiði í ár. Áætlað er að hagvöxtur í fyrra hafi verið töluvert meiri en áður hafði verið gert ráð fyrir eða 3% í stað 2,3% í nóvemberspánni. Skýrist það af mun hagstæðara framlagi utanríkisviðskipta en innlend eftirspurn þróaðist í takt við nóvemberspána,“ segir í Peningamálunum.