Verðbólguhorfur versna á næstu tveimur árum

Seðlabankinn spáir því að verðbólga verði minni á þessu ári en í síðustu spá vegna hærra gengis krónunnar og minni hækkunar launakostnaðar á framleidda einingu. Þetta kemur fram í Peningamálum 2014 sem bankinn gaf út í dag.

Gangi forsendur um þróun launa og gengis eftir verður verðbólga í námunda við verðbólgumarkmiðið á þessu ári.

Hins vegar segir bankinn að þegar áhrif nýliðinnar gengishækkunar fjara út og framleiðsluslaki snýst í spennu gæti verðbólga aukist á ný og orðið um nokkra hríð yfir verðbólgumarkmiðinu.

Samkvæmt spánni verður hún mest 3,5% seint á næsta ári en hjaðnar síðan á árinu 2016 vegna stífara taumhalds peningastefnunnar.

Gangi spáin eftir verður verðbólga eitthvað yfir markmiði í lok spátímans en markmiðið er þó vel innan þeirra marka sem talið er að 50% líkur séu á að verðbólgan verði.