Unnið að tvískráningu Íslandsbanka

Ráðgjafar á vegum slitastjórnar Glitnis funduðu um miðjan janúar með stærstu bönkum Skandinavíu með það fyrir augum að skrá Íslandsbanka á markað á Norðurlöndunum. Bankinn yrði þá tvískráður og stærsti hluti bréfa hans færi í Kauphöllina í Osló en 10-20% á Íslandi.

Slitastjórn Glitnis skipaði hóp sem falið var það verkefni, sem kallað er Project Puffin, að kanna áhuga fjárfesta á kaupum á hlut í Íslandsbanka verði bankinn tvískráður. Fundað var með nokkrum af stærstu bönkum Norðurlandanna og fulltrúum kauphalla. Tíu fundir voru haldnir og var meðal annars fundað með fulltrúum DnB, Nordea og SEB. Niðurstaða fundanna leiddi í ljós að áhugi væri fyrir hendi en hvort af þessu geti orðið veltur alfarið á afstöðu íslenskra stjórnvalda. Þetta kemur fram í Kjarnanum í dag.

Bókfært virði Íslandsbanka er um 132 milljarðar króna og með því að selja bankann fyrir erlendan gjaldeyri mun losna um tæpan helming þeirrar snjóhengju íslenskra króna í eigu útlendinga sem tilkomin er vegna slita Glitnis og skref stigið í átt að afnámi gjaldeyrishafta. Kröfuhafar virðast tilbúnir til að gefa þorra krónueigna sinna með því að taka lágu tilboði og það sem eftir myndi standa yrði sett á skuldabréf sem fjármagna myndi nýju bankana á lágum vöxtum til langs tíma og lækka þar með fjármagnskostnað þeirra. Verð bankans mun þó af einhverju leyti ráðast af áætlunum um afnám hafta. Verði höftin enn við lýði gætu erlendir fjárfestar verið tilbúnir til að borga 0,7 til 0,8 sinnum eigið fé bankans fyrir hlutafé í honum. Um það bil 10 til 20% yrðu síðan seld í Kauphöll Íslands og lífeyrissjóðum. Þá yrðu öðrum fjárfestum kleift að kaupa bréf fyrir um 15 til 30 milljarða króna.



Páll Harðarson, forstjóri Kauphallar Íslands segir í viðtali við Kjarnann að tvískráning sé rökrétt skref í mörgum tilfellum og segir erlenda fjárfesta mun áhugasamari en áður.

„Það væri mjög ákjósanlegt að fá erlenda eigendur að svona fyrirtækjum og það skiptir miklu máli til skamms tíma vegna haftanna. Stjórnvöld ættu að gera allt sem þau geta til að koma eignarhlutum í erlenda eigu,“ segir Páll Harðarson.