Samherji, Já og Eignamiðlun eru framúrskarandi fyrirtæki ársins 2013

Fjármálaráðherra veitti í dag verðlaun þeim þremur fyrirtækjunum sem talin eru hafa staðið fram úr á liðnu ári. Creditinfo tilefnir árlega framúrskarandi fyrirtæki í þremur stærðarflokkum og í ár voru alls 462 fyrirtæki á lista Creditinfo.

Með valinu er verið að veita viðurkenningu fyrir stöðugleika og ráðdeild í rekstri þar sem fyrirtækin þurfa að uppfylla ákveðin skilyrði matsins þrjú ár í röð.



Samherji, Já og fasteignasalan Eignamiðlun fengu viðurkenningar fyrir að vera efst á lista Framúrskarandi fyrirtækja ársins 2013 í sínum stærðarflokkum.

Eignamiðlun fékk verðlaunin í flokki lítilla fyrirtækja, Já var hlutskarpast í hópi millistórra fyrirtækja og Samherji hlaut viðurkenninguna í flokki stórra fyrirtækja. Samherja fékk einnig verðlaun fyrir að teljast mest framúrskarandi fyrir listann í heild.

Í fréttatilkynningu Creditinfo af verðlaunaafhendingunni kemur fram að á lista Framúrskarandi fyrirtækja í ár eru um 1,4% af þeim 33.000 fyrirtækjum sem skráð eru á Íslandi. „Fyrirtækjum hefur fjölgað í öllum landshlutum og er það vísbending um að rekstur hafi batnað þar sem skilyrðum þess að komast á listann hefur ekki verið breytt,“ segir í tilkynningunni.