Aflinn dróst saman um 57 prósent

Heildarafli íslenskra skipa í janúar nam alls 62.509 tonnum samanborið við 146.863 tonn í sama mánuði 2013. Aflinn í tonnum talið dróst því saman um 57,4% á milli ára. Þar hefur mikill samdráttur í loðnuafla mest að segja. Þetta kemur fram í upplýsingum frá Hagstofu Íslands.

Heildaraflinn, metinn á föstu verði, dróst saman um 22,9%. Botnfiskafli dróst lítillega saman í janúar milli ára eða um 3,7% sem skýrir af hverju samdráttur aflans á föstu verði er mun lægri í prósentum talið heldur en samdráttur aflans í tonnum.

Þar af var þorskaflinn tæp tuttugu þúsund tonn, sem er samdráttur um tuttugu tonn frá janúar í fyrra. Ýsuaflinn nam tæpum 4.324 tonnum sem er samdráttur um 368 tonn.

Afli uppsjávartegunda dróst saman um 75,6% milli ára þegar hann nam tæpum 26.845 tonnum. Hrun í veiðum á loðnu er þar eins og áður segir um að kenna, því meira veiddist af bæði síld og kolmunna í síðastliðnum janúarmánuði en í sama mánuði 2013