Yfirmenn fyrirtækja segja mismunun eiga sér stað á vinnumarkaði

Meirihluti fyrirtækja á Íslandi með 25 starfsmenn eða fleiri er hefur ekki áætlun um hvernig bregðast eigi við kynferðislegri áreitni. Þá vinna meirihluti þeirra einnig ekki eftir jafnréttisáætlun. Mikill meirihluti yfirmanna fyrirtækja telur að mismunun ætti sér stað á íslenskum vinnumarkaði og þá mest á grundvelli kynferðis.

Þetta kemur fram í skýrslunni Jafnrétti á vinnustöðum á Íslandi, sem gerð var á vegum Jafnréttisstofu. Yfirmenn fyrirtækja með 25 starfsmenn eða fleiri voru spurðir um jafnréttismál og viðhorf til mismununar á eigin vinnustað og á íslenskum vinnumarkaði almennt. Könnunin náði til 558 fyrirtækja og svarhlutfall var 50,5 prósent.

Þá var einnig spurt um þekkingu á og viðhorf til tilskipana ESB um jafnrétti án tillits til kynþáttar eða þjóðernisuppruna og bann við mismunun á vinnumarkaði og í starfi. Rannsóknin var þáttur í verkefni sem Jafnréttisstofa tekur þátt í með Mannréttindaskrifstofu Íslands og Fjölmenningarsetrinu á Ísafirði.

Yfir 80 prósent svarenda þekkja ekki áðurnefndar tilskapanir ESB og 62,7 prósent telja fræðslu vanta um þær. Þó hafa 59,6 prósent lítinn eða engan áhuga á að þekkja betur til þeirra. Meirihluti svarenda, eða 62,4 prósent, telja ekki þörf á nýrri jafnréttislöggjöf sem tæki til fleiri þátta en kynferðis.

Þá segir í skýrslunni að nokkur munur hafi verið á afstöðu til þessara spurninga eftir kyni og stöðu svarenda. „Þær bakgrunnsbreytur sem höfðu mest áhrif á niðurstöður voru kyn og staða svarenda ásamt stærð fyrirtækis. Kyn tengdist einnig öðrum bakgrunnsbreytum þar sem konur voru hlutfallslegra yngri, höfðu meiri formlega menntun og unnu frekar sem starfsmannastjórar eða mannauðsstjórar en karlar.“