Ákvörðun Seðlabankans í samræmi við væntingar markaðsaðila

Peningastefnunefnd Seðlabanka Íslands ákvað sl. miðvikudag að halda stýrivöxtum óbreyttum. Þessi ákvörðun var í góðu samræmi við væntingar markaðsaðila en Hagfræðideild hafði spáð óbreyttum vöxtum en þetta kemur fram í fréttatilkynningu frá Hagfræðideild Landsbankans.

Hagfræðideild benti á að aðstæður gætu verið að skapast fyrir vaxtalækkun á næstunni. Miðað við nýja verðbólguspá Seðlabankans telur nefndin ekki tilefni til lækkunar vaxta og að vextir þurfi að hækka að öðru óbreyttu þegar fram í sækir.

Peningamál Seðlabanka Íslands komu út samhliða vaxtaákvörðuninni. Verðbólguhorfur árið 2014 hafa batnað, en versnað árin 2015 og 2016. Versnandi verðbólguhorfur skýrast að miklu leiti af skuldaniðurfellingaráformum ríkisstjórnarinnar.

Spá um hagvöxt var færð upp fyrir síðasta ár en spá þessa árs er óbreytt. Einnig var í Peningamálum ítarleg umfjöllun um áhrif skuldalækkunarinnar.

Helstu niðurstöðurnar voru að niðurfærslan komi til með að valda aukinni verðbólgu og metur Seðlabankinn það svo að vextir þurfi að vera 1% hærri en ella árið 2016 vegna þessa.

Hagfræðideild benti á í Hagsjá að viðbrögð forsætisráðherra við greiningu Seðlabankans væru til marks um að ríkisstjórn landsins vantreysti Seðlabankanum til að gegna lögbundnum skyldum sínum.

Í vikunni fór fram útboð á ríkisvíxlum hjá Lánamálum ríkisins. Alls var tekið tilboðum fyrir 3,9 ma. kr. Á þriggja mánaða víxlum var krafan 4,35%, en 4,50% á sex mánaða víxlum.

Samkvæmt tölum Vinnumálastofnunar var atvinnuleysið 4,5% í janúar og hækkaði um 0,3% frá fyrri mánuði. Atvinnuleysið er einni prósentu lægra en það var á sama tíma í fyrra.

Úrvalsvísitalan lækkaði um 1,1% í vikunni. Krónan styrktist á móti evru og Bandaríkjadal í vikunni. Hins vegar veiktist hún á móti sterlingspundi.