Fjögur norsk loðnuskip við veiðar

Fjögur norsk loðnuskip, sem ætla að nýta sér framlengingu á veiðiheimildum hér við land fram að helgi, eru nú norður á Skjálfandaflóa. Skipin eru í grennd við Flatey og virðast vera að bíða birtingar en loðnan veiðist aðeins í björtu.

Hin skipin eru öll farin heim aftur eins og fram er komið í fréttum. Af atferli norsku skipanna í nótt má ráða að þau hafi fundið eitthvað og séu að kanna það nánar.

Annars verður loðnu nú víða vart, til dæmis austur af Breiðdalsvík og á nokkrum stöðum við Suðurströndina, en fremsta gangan er nú komin fyrir Reykjanes og inn á Faxaflóa.