Attentus sinnir mannauðsmálum fyrir HB Granda

HB Grandi hf. og Attentus – mannauður og ráðgjöf hafa gert með sér samning um að sérfræðingar Attentus hafi heildarumsjón með starfmannamálum HB Granda í samvinnu við starfsþróunarstjóra félagsins. Í tilkynningu frá Attentus segir að markmiðið með samningnum sé að HB Grandi fái bestu mögulega þjónustu og ráðgjöf í stjórnun mannauðsmála.

„HB Grandi hf. er eitt stærsta sjávarútvegsfyrirtæki á Íslandi og hefur skipað sér í fremstu röð fyrirtækja á sínu sviði.  Hjá fyrirtækinu vinna um 700 starfsmenn til sjós og lands. Lögð er rík áhersla á háþróaða tækni við veiðar og vinnslu og stöðuga þróun framleiðslunnar. Með samstarfinu við Attentus vill HB Grandi styrkja og efla stjórnun starfsmannamála sem mikilvægan þátt í að efla og viðhalda góðum árangri fyrirtækisins,“ segir í tilkynningunni.

Úthýsing mannauðsmála hefur færst í vöxt hjá fyrirtækjum hér á landi eins og annarstaðar í heiminum undanfarin ár.

„Þessi leið gefur fyrirtækjum tækifæri til að draga úr kostnaði en á sama tíma efla faglega mannauðsþjónustu, stuðning og ráðgjöf við stjórnendur og starfsfólk. Rannsóknir á árangri fyrirtækja sem valið hafa þessa leið hafa meðal annars sýnt fram á meiri stöðugleika, fjárhagslegan ávinning og aukna framleiðni þegar þessi leið er valin,“ segir í tilkynningu Attentus.

Attentus veitir ráðgjöf um allt sem snýr að rekstri og stjórnun út frá áherslum mannauðsstjórnunar. Árið 2012 fékk fyrirtækið hvatningarverðlaun FKA fyrir að eiga meðal annars frumkvæði að því að bjóða fyrirtækjum og stofnunum lausnina „mannauðsstjóri til leigu.”

Hjá Attentus starfa nú átta starfsmenn, sex ráðgjafar og tveir sérfræðingar, sem sinna verkefnum á þessu sviði.