Ekki tilefni til stækkunar loðnukvóta

Nýafstaðnar mælingar Hafrannsóknastofnunnar gefa ekki tilefni til að breyta ákvörðun stofnunarinnar frá því í haust um 160 þúsund tonna aflamark á loðnu. Leitað var að loðnu á skipi stofnunarinnar Árna Friðrikssonar og þann 14. febrúar var lagt út frá Akureyri á Vestfjarðamið.

Þar varð ekki vart við loðnu og skipinu því siglt suður fyrir land. Þar mætti skipið hrygningargöngunni skammt vestan við Selvog. „Megin gangan var með ströndinni á svæðinu frá Selvogi austur undir Kötlutanga og í kringum Vestmannaeyjar. Haldið var austur undir miðja Meðallandsbugt, en lítið fannst austast á leitarsvæðinu,“ segir í frétt á vef Hafrannsóknastofnunar.

Ætlunin var að endurtaka mælinguna, en veður kom í veg fyrir að úr því yrði.

„Mælingar Hafrannsóknastofnunar á veiðistofninum s.l. haust og tillögur leiddu til þess að gefið var út 160 þús. tonna aflamark fyrir yfirstandandi vertíð. Nýafstaðnar mælingar gefa ekki tilefni til að breyta þeirri ákvörðun.“