Fjármálaráðherra undrast harða gagnrýni SA á ríkisstjórnina

Fjármálaráðherra undrast þá gagnrýni framkvæmdastjóra Samtaka atvinnulífsins að enginn munur sé á núverandi og fyrrverandi ríkisstjórn í skattamálum fyrirtækja. Þar sé tugmilljarða munur á og ráðherra segir tímasetningu þessarar gagnrýni einkennilega.

Þorsteinn Víglundsson, framkvæmdastjóri Samtaka atvinnulífsins gagnrýnir ríkisstjornina harðlega í opnuviðtali í Morgunblaðinu í vikunni og segir að framlag ríkisstjórnarinnar til kjarasamninganna hafi valdið vonbrigðum. Ríkisstjórnin haldi áfram á sömu braut og fyrri ríkisstjórn með aukningu skattbyrði á atvinnulífið.

„Mér koma þessi ummæli mjög á óvart. Við erum búin að kynna og höfum þegar ákveðið lækkanir á tryggingagjaldi sem mun þegar þær eru komnar til framkvæmda  lækka tryggingagjald um fjóra milljarða á ári á atvinnulífið.Við höfum líka lækkað skatta á einstaklinga sem hlýtur að hafa greitt fyrir gerð kjarasamninga. Það eru aðgerðir sem auka kaupmátt launþegana í landinu,“ segir Bjarni Benediktsson fjármálaráðherra.

Auk þess hafi ríkisstjórnin dregið úr áformum fyrri ríkisstjórnar um hækkun veiðigjalda og auðlegðarskattur verði ekki framlengdur.

„Það munar milljarða tugum á skattastefnu þessarar ríkisstjórnar og þeirrar sem áður var og þeim áformum sem þeir flokkar sem voru í þeirri ríkisstjórn  sátu hafa verið með á þingi,“ segir fjármálaráðherra.

Hins vegar sé rétt að bankaskattur hafi verið hækkaður verulega, sem bitni fyrst og fremst á stóru fjármálafyrirtækjunum sem standi sterkt og hafi stóraukið eiginfjárstöðu sína og skili glimrandi góðri afkomu.

„Og sá skattur var alltaf  ætlaður til að endurheimta þann kostnað sem ríkissjóður hefur orðið fyrir út af falli fjármálakerfisins. Þei sem greiða mest af þeim skatti eru hins vegar slitabúin,“ segir Bjarni.

Finnst þér ósanngjarnt af Samtökum atvinnulífsins að draga einmitt þá skattheimtu inn í þessa umræðu?

„Mér finnst bara einkennilegt af þeim sem við höfum átt góð samskipti við að koma á þessum tímapunkti með athugasemdir við aðgerðir ríkisstjórnarinnar. Vegna þess að þegar við kynntum okkar aðgerðir var það næsta sem  þessir aðilar gerðu að skrifa undir kjarasamninginn,“ segir Bjarni Benediktsson fjármálaráðherra.