Mercedes-Benz S og G bílar ársins hjá Auto Motor und Sport

Mercedes-Benz S-línan og hinn goðsagnakenndi Mercedes Benz G-jeppi hafa verið valdir bestu bílar ársins 2014, hvor í sínum flokki. Þetta voru niðurstöður í vali lesenda þýska tímaritsins „Auto Motor und Sport“. Báðir bílarnir hafa því hlotið sæmdarheitið „Besti bíll ársins 2014“.

Hið víðlesna bílatímarit Auto Motor und Sport hefur um margra ára skeið staðið fyrir vali á bíl ársins. Að þessu sinni tóku 115.285 lesendur þátt í valinu. Mercedes-Benz S hefur löngum verið órjúfanlega tengdur tækninýjungum og ríkulegum útbúnaði.

Hann státar af snjöllum öryggisbúnaði, þar á meðal getur hann með upp að vissu marki fylgt með sjálfvirkum hætti eftir bílum sem á undan fara í umferðarhnútum. Annar hápunktur bílsins er svokallað MAGIC BODY fjöðrunarstýrikerfi, sem gerir Mercedes-Benz S fyrsta bílinn í heimi sem greinir ójöfnur í veginum framundan og lagar fjöðrunarkerfið að þeim áður en ekið er yfir þær. Með þessari tækni er hugtakið „akstursþægindi“ í raun endurskilgreint.

Mercedes Benz G er fyrir löngu orðinn klassískur jeppi. En velgengni hans virðist engan endi ætla að taka. G-línan lagði grunninn að jeppafjölskyldu Mercedes-Benz strax árið 1979. Síðan hefur G-línan tekið stöðugum breytingum og betrumbótum. Núna hefur þessi klassíski unglingur öðlast goðsagnakennda stöðu á meðal jeppaáhugamanna heimsins. Hann hefur stöðugt verið uppfærður með nýjustu hátækni og hágæðabúnaði og innréttingum og hefur þess vegna án vandkvæða varið stöðu sína sem draumajeppinn.