Stór ráðstefna haldin á Íslandi í mars

Reykjavík Internet Marketing Conference verður haldið á Grand Hotel í Reykjavík þann 28. mars næstkomandi. Þá munu framkvæmdastjórar markaðssviða KLM, Hilton, Heineken, Lenovo og Nokia halda fyrirlestra um aðgerðir fyrirtækjanna á internetinu.

„Þetta er stærsta ráðstefna sinnar tegundar sem haldin hefur verið á Íslandi. Við erum búin að leggja á okkur mikið erfiði til að fá til landsins þennan frábæra hóp fyrirlesara sem allir eiga það sameiginlegt að vinna fyrir stór alþjóðleg vörumerki,“ segir Kristján Már Hauksson ráðstefnustjóri RIMC í tilkynningu.

„Það hefur verið persónulegur metnaður minn að fá til landsins fyrirlesara sem hjálpa íslensku markaðsfólki að skilja þá möguleika sem Internetið hefur að bjóða og er þetta ellefta ráðstefnan sem er haldin. Ég get ekki annað sagt en að mér finnist þetta hafi tekist vel“.

Ajit Sivadasan, forstjóri Lenovo, mun einnig vera með fyrirlestur, sem og forstjóri Google í Noregi, Jan Grønbech. Hann mun fjalla um áhrif youtube á til dæmis sjónvarpsmarkaðinn. Framkvæmdastjóri KLM mun segja frá frumlegri notkun á félagsmiðlum.

Sama kvöld verða Evrópuleitarvélaverðlaunin 2014 afhent en um er að ræða verðlaun sem veitt eru þeim sem skarað hafa fram úr í leitavélamarkaðssetningu.

„Verðlaunin draga til sín allar stærstu netmarkaðsstofur Evrópu og verður því mikið um dýrðir. Gefin eru verðlaun í 19 flokkum og má reikna með töluverðum fjöldi fólks  erlendis frá til að sjá báðar uppákomurnar. Um er að ræða einstakt tæki færi fyrir íslenskt markaðsfólk að koma og sjá hvað er að gerast hjá kollegum þeirra frá Evrópu,“ segir í tilkynningunni.