Varaborgarfulltrúi í hart við smálánafyrirtæki

„Það má segja að ég sé í aðför gegn smálánafyrirtækjum, enda tel ég þessa gjaldtöku flýtiþjónustugjalds ólögmæta," segir Eva H. Baldursdóttir, lögfræðingur og varaborgarfulltrúi Samfylkingarinnar, sem hefur, ásamt lögmanni sínu Braga Dór Hafþórssyni, sent smálánafyrirtækinu Kredia ehf. innheimtubréf.

Í bréfinu krefst Eva þess að Kredia ehf. endurgreiði henni 5.900 krónur, svokallað flýtiþjónustugjald, sem fyrirtækið lagði ofan á smálán sem hún tók.

Eva telur að flýtiþjónustugjaldið sé andstætt nýjum lögum um neytendalán en þeim var breytt þann 1. nóvember 2013. Verði Kredia ehf. ekki að kröfum Evu ætlar hún sér að leita réttar síns fyrir dómsstólum.

Eva tók lán hjá Kredia upp á 20.000 krónur sama dag og ný neytendalán tóku gildi. Flýtiþjónustugjaldið var sem fyrr segir 5.900 krónur.

Í lögunum er sett hámark á svokallaða árlega hlutfallstölu kostnaðar sem aðeins má vera um 50% á ársgrundvelli en Eva telur flýtiþjónustuna falla undir þann kostnað.

„Árleg hlutfallstala kostnaðar er í raun allur heildarkostnaður við töku láns að vöxtum meðtöldum. Löggjafinn hefur sett hámark á innheimtu þessa hlutfallstölu kostnaðar á ársgrundvelli, þ.e. 50% vexti að viðbættum stýrivöxtum. En með flýtiþjónustugjaldi smálánafyrirtækja fer árleg hlutfallstala kostnaðar yfir 400% á ári,“ segir Eva.

„Ef þetta er ekki ólögmætt gjald er lánafyrirtækjum heimilt að sniðganga skýrt markmið ákvæðisins, að banna okurvaxtastarfsemi á afar ódýran hátt en ekki síður skýr markmið laganna að standa vörð um neytendur.“

„Nú er næsta mál að bíða eftir viðbrögðum frá Kredia ehf. við bréfinu. Þegar ný lög tóku gildi breyttu þeir aðeins starfsemi sinni og fóru að taka upp þetta flýtiþjónustugjald. Eflaust eru þeir að reyna byggja það á einhverri þröngri túlkun á ákvæðum neytendalánalaga en ég tel þá túlkun andstæð lögunum og ekki síður markmiðum þeirra. Þá spyr ég mig jafnframt um siðferði slíkra starfshátta þó allajafna sé ekki spurt um það þegar kemur að túlkun laga."

„Áður en lögin voru sett voru dæmi um að vextir af smálánum að meðtöldum lántökukostnaði færi yfir 600% á ársgrundvelli. Það getur varla talist annað en okurvaxtastarfsemi. Að mínu mati ber að banna slíkt. Þá spyr ég mig jafnframt um siðferði slíkra starfshátta þó allajafna sé ekki spurt um það þegar kemur að túlkun laga."

Hér að neðan má lesa bréfið sem Eva sendi Kredia.