56 milljónum úthlutað úr Orkurannsóknarsjóði Landsvirkjunar

Sjöunda úthlutun Orkurannsóknarsjóðs Landsvirkjunar fór fram við hátíðlega athöfn í Háskólanum í Reykjavík í gær.

Að því er fram kemur í tilkynningu frá Landsvirkjun var 56 milljónum úthlutað til margvíslegra verkefna á sviði umhverfis- og orkumála. Fjölmargar góðar umsóknir hagi borist en veittir eru styrkir til nemenda í meistara- eða doktorsnámi og til rannsóknaverkefna.

Sjö doktorsnemar fengu styrk að upphæð 1.200.000 krónur hver og tólf styrkir voru veittir til meistaranema, að upphæð 600.000 krónur hver. Af veittum styrkjum í meistara- eða doktorsnámi voru sex styrkir til virkjunarmála en þrettán til rannsókna á náttúru og umhverfi. Til rannsóknarverkefna voru veittir styrkir að heildarupphæð 40,5 milljónir króna til 18 verkefna. Verkefnin eru mjög fjölbreytt og voru sjö styrkir til orkumála og ellefu til rannsókna á náttúru og umhverfi.

Markmið sjóðsins er að efla rannsóknir á sviði umhverfis- og orkumála og veita styrki til námsmanna, rannsóknarverkefna á vegum háskóla, stofnanna, fyrirtækja og einstaklinga. Sjóðurinn miðar að því að gera fjárframlög Landsvirkjunar til rannsókna skilvirkari og sýnilegri, og tryggja að þær rannsóknir sem sjóðurinn styrkir samræmist umhverfisstefnu Landsvirkjunar. Stjórnarformaður sjóðsins er Sveinbjörn Björnsson, eðlisfræðingur og fyrrum háskólarektor, en stjórn Orkurannsóknarsjóðs skipa fjórir fulltrúar háskólasamfélagsins og tveir fulltrúar Landsvirkjunar.