Borgin skipulagði of margar íbúðir

Reykjavíkurborg fór í nýju aðalskipulagi yfir hámark þess fjölda íbúða, sem svæðisskipulag höfuðborgarsvæðis gerir ráð fyrir í borginni. Þetta er ein af þremur meginástæðum þess að Skipulagsstofnun hafnaði að staðfesta aðalskipulagið og ákvað að vísa því aftur til borgarinnar.

Áður hefur komið fram í fréttum að staðfestingar var hafnað vegna þess að fyrirvara vantar vegna flugvallarins og að áform borgarinnar um að falla frá mislægum gatnamótum á stofnbrautum ganga gegn svæðisskipulagi höfuðborgarsvæðis, sem er æðra aðalskipulaginu.

Í athugasemdum Skipulagsstofnunar til Reykjavíkurborgar kemur fram að svæðisskipulag höfuðborgarsvæðis geri ráð fyrir allt að 59.760 íbúðum í Reykjavík árið 2024, sem með 10% vikmörkum séu 61.576 íbúðir. Skipulagsstofnun telur nýja aðalskipulagið hins vegar gera ráð fyrir, með vikmörkum, nærri 64.000 íbúðum í Reykjavík árið 2024, eða 2.000-3.000 fleiri íbúðum en svæðisskipulagið gerir ráð fyrir. Skipulagsstofnun óskar eftir skýringum á þessu misræmi og, eftir atvikum, viðeigandi leiðréttingum.