Mat Frosta að MP-banka hafi ekki verið sérstaklega hlíft

Efnahags- og viðskiptanefnd Alþingis fundaði í morgun um þá ákvörðun að hækka frískuldamark bankaskatts upp í fimmtíu milljarða.

Ákvörðunin var tekin á fundi nefndarinnar á síðasta ári en breytingin hafði það í för með sér að skattgreiðslur MP-banka lækkuðu um 78 prósent eða um tæpar tvö hundruð milljónir.

Árni Páll Árnason, formaður Samfylkingarinnar, óskaði eftir því að nefndin myndi fjalla um málið en fram hefur komið í fjölmiðlum að helstu stjórnendur bankans tengjast forystumönnum ríkisstjórnarinnar bæði vina- og fölskylduböndum.

Hjörtur Hjartarson, fréttamaður, hefur verið á nefndarsviði Alþingis í morgun og ræddi við Frosta Sigurjónsson, formann efnahags- og viðskiptanefndar Alþingis, og Árna Páll Árnason, formann Samfylkingarinnar, nú fyrir hádegi.

Þar sagði Frosti að fundurinn hafi heppnast vel og að gestir frá fjármálaráðuneytinu hafi verið viðstaddir. Þar var útskýrt hvernig þessi tala varð til.

Það var einnig útskýrt hvernig þetta frískuldamark verður til og síðan var rætt um það hvernig þetta frímark kemur við einstaka fyrirtæki.

Það var ekki mat Frosta eftir fundinn í morgun að MP-banka hafi verið sérstaklega hlíft.

Í samtali við Hjört sagði Árni Páll Árnason að hann hefði gjörólíka upplifun af þessum fundi og var ekki sáttur við þau svör sem hann fékk.

Þau hafi ekki ekki verið nægilega skýr og því vildi hann kalla eftir öðrum fundi þar sem það yrði almennilega skýrt út hvaðan þessi tala kemur.

Það þyrfti einni að skýra út nákvæmlega tengsl stjórnenda MP-banka við stjórnvöld.

Nánar verður fjallað um málið í kvöldfréttum Stöðvar 2.