Harmageddon

Sannleikurinn: Sjónvarpsmaður á RÚV sagði brandara

Hér er hugmynd að spurningu fyrir Gettu Betur. Hverjir réðust inn í Austurríki 1938?
Hér er hugmynd að spurningu fyrir Gettu Betur. Hverjir réðust inn í Austurríki 1938?
Íþróttafréttamanni hjá RÚV varð það á í beinni útsendingu að segja brandara og hann gæti þurft að taka pokann sinn í kjölfarið. Það er ef æstur múgurinn nær honum ekki áður.

„Það er ástæða fyrir því að við reynum ekki að vera spaugsöm hér. Nú er hugsanlega komin upp milliríkjadeila milli Íslands og Austurríkis og bara af því að reynt var að grínast,“ segir Björn Guðmundsson, starfandi útvarpstjóri.

„Ef þeir óska eftir því þá munum við að sjálfsögðu framselja Björn Braga til Austurríkis þar sem hann yrði væntanlega ákærður fyrir grínsglæpi gegn mannkyninu en það á bara eftir að koma í ljós.“

Málið hefur vakið mikið umtal og hneykslan. Margir eru í sárum eftir brandarann og eru enn að reyna púsla sér saman aftur. Einhverjir hafa þó varið hann, hafa sagt það furðulegt að ekki megi gera grín að jafn hryllilegum hópi fólks og nasistum. 

Björn hafði þetta að segja um málið sjálfur:

„Ég skil þetta ekki. Ég geri grín að einhverjum grimmasta flokki rugludalla tuttugustu aldarinnar og líki þeim við einhverja ómerkilegustu og sjálfhverfustu þjóð sögunnar og annar hver maður stórhneykslast.
Hugsanlega gekk ég of langt þegar ég líkti nasistum við íslendinga, en vitiði hvað? Þeir eiga það fyllilega skilið!“

Grínistarnir eru strax byrjaðir.
Fjölmiðlar í Austurríki hafa fjallað um málið í dag og birta ósmekklega brandarann sem einhver þjóðernissvikari er búinn að þýða fyrir þá. Hugsanlega hefur Hanna Birna lekið honum líka.

Hann er svona: Wenn ist das Nunstück git und Slotermeyer? Ja! Beiherhund das Oder die Flipperwaldt gersput!



Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu þar sem einu leyfilegu brandararnir innihalda tómata að fara yfir götu og Hafnfirðinga.






Velkomin á Vísi. Þessi vefur notar vafrakökur. Sjá nánar.