Dregur úr atvinnuleysi

Atvinnuleysi mældist 4,4 prósent í desember síðastliðnum samkvæmt Vinnumarkaðsrannsókn Hagstofu Íslands. Þá voru að jafnaði 185.100 manns á vinnumarkaði. Af þeim voru 176.000 starfandi og atvinnuþátttaka því 80,9 prósent.

Samanburður mælinga Hagstofunnar í desember 2012 og 2013 sýnir að atvinnuþátttaka jókst um 0,8 prósentustig og hlutfall atvinnulausra minnkaði um 1,1 prósentustig milli ára.

„Árstíðaleiðréttur fjöldi fólks á vinnumarkaði í desember 2013 var 187.500 sem jafngildir 81,7% atvinnuþátttöku sem er aukning um 900 manns frá nóvember og hlutfallið þá var 81%. Fjöldi atvinnulausra í desember var 8.600 og fækkaði um 400 manns frá því í nóvember 2013. Hlutfall atvinnulausra var 4,6% í desember en var 4,8% í nóvember,“ segir á vef Hagstofunnar.