Vefsalan hjá Lax-Á að fara í gang

Það styttist í að vefsala Lax-Á fari af stað á vefnum agn.is en salan á veiðileyfum þar á bæ er búin að vera mjög góð síðustu daga.

Framboðið af ám er minna en í fyrra en þrátt fyrir það er salan meiri og mikið er sótt í þau svæði þar sem veiðimenn sjá um sig sjálfir í húsi. Vinsæl svæði eru t.d. Sog Syðri Brú, Tannastaðatangi í Soginu og Svartá.

Stóra Laxá er svo gott sem uppseld og þeir veiðimenn sem ætla að reyna að komast í hana á komandi veiðisumri ætti að hafa hraðar hendur. Veiðin í fyrra var 1776 laxar sem er ótrúleg veiði á alla mælikvarða en það friðunarátak sem nú stendur yfir í ánni ætti vonandi að skila fleiri sterkum sumrum í náinni framtíð.

Þeir sem veiddu Stóru Laxá í fyrra haust sögðu að mikið hefði verið af laxi í sumum hyljum hennar og nokkuð margir vænir lágu þar inn á milli eins og alltaf í þessari rómuðu stórlaxaá.