Reynir á raunsæi innan slitastjórnanna

Bjarni Benediktsson, fjármála- og efnahagsráðherra, sagði á Alþingi í morgun að það virtist vera mikill vandi fyrir slitastjórnir föllnu bankanna að samræma vilja mörg þúsund kröfuhafa, það reyni á raunsæi innan slitastjórnanna.

Guðmundur Steingrímsson, þingmaður Bjartrar framtíðar, spurði ráðherra út í orð Sigmundar Davíðs Gunnlaugssonar forsætisráðherra í viðtali hans við bandaríska fjármálavefinn Bloomberg þar sem Sigmundur sagði engar viðræður í gangi milli íslenskra stjórnvalda og erlendur kröfuhafana. Það sé ekki hlutverk ríkisstjórnarinnar að fara í viðræður við kröfuhafana og ekki standa til að semja neitt við þá.

Guðmundur spurði Bjarna hvort hann væri sammála þessum orðum forsætisráðherra og hvernig hann sæi fyrir sér að afnema eigi gjaldeyrishöftin.

Bjarni sagði að til þess verði að horfa að það sé ekki íslenska ríkið sem að skuldar þessa fjármuni. Allt forræði sé á höndum slitastjórnanna en Bjarni fundi með þeim þar sem farið sé yfir stöðuna.

Hann sagði það hlutverk slitastjórnanna að ná nauðasamningi sín í milli og leggja hann fyrir kröfuhafana, fá hann samþykktan og taldi málin fyrst og fremst stranda á því að þessum félögum takist að ná samningum sem líklegri séu til þess að ganga upp með hliðsjón af þeim gjaldeyrishöftum sem eru í gildi í landinu.

Bjarni sagði ennfremur að þeir kröfuhafar sem séu orðnir langþreyttir eigi ekki meiri rétt heldur en aðrir kröfuhafar og ítrekaði að stjórnvöld eiga fyrst og fremst samskipti við slitastjórnirnar.