Spennu hleypt á bræðslu Skinneyjar-Þinganess

Afhendingargeta raforku tvöfaldast á Hornafjarðarsvæðinu og afhendingaröryggi eykst stórlega með tilkomu nýrrar aðveitustöðvar RARIK á Höfn í Hornafirði og nýjum útgangi Landsnets í aðveitustöð á Hólum ásamt 132 kV tengingu frá Hólum til Hafnar.

Fram kemur í tilkynningu frá Landsneti að Ásgerður Gylfadóttir, bæjarstjóri Hornafjarðar, hafi í dag formlega tekið í notkun nýja aðveitustöð RARIK á Höfn þegar spennu var hleypt inn á rafskautsketil í fiskimjölsverksmiðju Skinneyjar-Þinganess. „Þar með skapast möguleiki á notkun raforku í stað olíu í verksmiðjunni,“ segir í tilkynningunni.

„Aðeins er rúmt ár frá því að Landsnet og RARIK gengu frá samkomulagi við Skinney-Þinganes um aukna afhendingu á raforku fyrir fiskimjölsverksmiðjuna á Höfn. Eins og kunnugt er hafa uppsjávarfyrirtækin, ekki síst á Austurlandi, fært sig í vaxandi mæli frá því að nota olíu yfir í notkun á innlendri raforku,“ segir þar jafnframt.

Fram kemur að allar fiskimjölsverksmiðjur frá Vopnafirði suður til Hornafjarðar hafi nú skipt yfir á rafmagn í stað olíu, sem þó gæti þurft að grípa til þegar byggðalínan er fulllestuð og annar ekki eftirspurn.

Með breytingunum er flutningsgetan inn á Hornafjarðarsvæðið sögð hafa tvöfaldast og afhendingaröryggi aukist verulega. „Nú eru tvær aðskildar leiðir inn til Hornafjarðar frá 132 kV byggðalínukerfinu. Skapar það möguleika á enn frekari atvinnuuppbyggingu á svæðinu.“

Heildarkostnaður RARIK við framkvæmdirnar eru sagðar nema um 300 milljónum króna og kostnaður Landsnets um 200 milljónum króna.