Vilja banna verðtryggingu nýrra lána til lengri tíma en 25 ára

Sérfræðingahópur um afnám verðtryggingar af nýjum neytendalánum leggur til að verðtrygging jafngreiðslulána til lengri tíma en 25 ára verði afnumin þann 1. janúar 2015.

Hópurinn vill einnig að lágmarkstími verðtryggðra neytendalána verði hækkaður úr fimm árum í allt að tíu ár, að takmarkanir verði settar á veðsetningu vegna verðtryggðra íbúðalána og hvatar til töku og veitingar óverðtryggðra lána verði auknir. 

Frá þessu var greint á blaðamannafundi í atvinnuvega- og nýsköpunarráðuneytinu nú fyrir stundu. Þar sögðu fulltrúar sérfræðingahópsins að aldrei áður hafi verið stigin stærri skref til afnáms verðtryggingar.