Landspítalinn og Kerecis undirrita samning í Hörpu

Landspítalinn og fyrirtækið Kerecis ehf. undirrita í dag samning um samvinnu á sviði rannsókna og prófana með það að markmiði að stuðla að þróun lækningatækni og auka nýsköpun á Íslandi. Undirritunin fer fram á Læknadögum í Hörpu.

Kerecis á Ísafirði hefur skapað sér mikla sérstöðu á heimsvísu með því að nota þorskroð sem ígræðsluefni í menn. Almennt eru ígræðsluefni búin til úr gerviefnum eða vef úr svínum. Í fyrsta rannsóknarverkefni samningsins verður öramyndun í gjafasárum rannsökuð. Gjafasár eru sár sem verða til þegar húð er fjarlægð til notkunar á öðrum stað á líkama sama einstaklings.

„Landspítali styður framþróun í læknavísindum og væntir þess að samstarfssamningur um klínískar rannsóknir á vörum Kerecis muni leiða til þess að fáanlegar verði nýjar og betri lækningavörur fyrir ört stækkandi markað um allan heim,“ segir í fréttatilkynningu spítalans.