Skrifa undir sáttmála um upprunamerkingar matvæla

Formenn Samtaka atvinnulífsins, Bændasamtaka Íslands og Neytendasamtakanna ætla í dag að skrifa undir „sáttmála um upprunamerkingar matvæla“. Undirritunin fer fram í höfuðstöðvum Sölufélags garðyrkjumanna í Brúarvogi 2, Reykjavík.

Með undirritun sáttmálans verður að sögn samtakanna formlega hleypt af stokkunum sameiginlegu átaki um bættar upprunamerkingar. Þar verður markmiðið að vekja almenning og fyrirtæki til umhugsunar um gildi þess að upprunamerkja mat.

„Takmarkið er að allar matvörur verði upprunamerktar þannig að neytendur velkist ekki í vafa um það hvar þær eru framleiddar og hvaðan hráefnið er fengið,“ segir í fréttatilkynningu.

Upprunamerkingar matvæla hafa verið talsvert í umræðunni að undanförnu. Fréttablaðið greindi meðal annars frá því í nóvember að íslenskir kjúklingaframleiðendur hefðu flutt frosna kjúklinga til landsins frá Evrópu og selt sem íslenska vöru.