Netgíró og Dalpay í samstarf

Netgíró, fyrirtæki sem býður viðskiptavinum að fá vörur afhentar áður en þeir greiða fyrir þær, hefur gengið frá samningum við greiðslumiðlunarfyrirtækið Dalpay, samstarfsaðila Valitor og Borgunar.

Samningurinn þýðir að söluaðilar sem nýta sér vefposaþjónustu Dalpay geta nú einnig boðið viðskiptavinum upp á Netgíró sem greiðslumáta.

„Viðskiptin með Netgíró eru kortalaus og viðskiptavinir geta valið að dreifa greiðslum með raðgreiðslum í allt að 12 mánuði á hagstæðum kjörum. Kortalaus viðskipti Netgíró, hvort heldur sem bein eða raðgreiðslur, eru einföld, örugg og hentug,“ segir í fréttatilkynningu Netgíró. Þar segir einnig að þjónustan hafi mælst mjög vel fyrir og fjöldi skráðra viðskiptavina hafi nú þegar nýtt sér hana. „Á fyrstu starfsmánuðunum hafa um 20.000 viðskiptavinir skráð sig hjá Netgíró og söluaðilar eru orðnir um 400 talsins.“