Sprotafyrirtækið sem fór heljarstökk

Þeir Dri-bræður eins og þeir kalla sig, Sindri Bergmann og Andri Franklin Þórarinssynir, urðu eitt af tíu heppnum teymum sem komust inn í þjálfunarbúðir Startup Reykjavík síðastliðið sumar. 207 teymi sóttu um en þeim tókst að bræða hjörtu dómnefndar, kannski með ástríðunni, kannski með viðskiptahugmyndinni sem snerist um sýndarveruleika til að næra sköpunargáfu barna.

En það er ekkert einfalt að laða fjárfesta að stórbrotinni hugsjón, eins og þeir bræður áttu eftir að komast að á þessum tíu erfiðu vikum sem þjálfunarbúðirnar stóðu yfir.  Og bræðurnir áttu eftir að tileinka sér eina af möntrum frumkvöðlafræðanna: „You only truly fail if you stop trying. So fail fast. Learn quickly. And start again.“ Sem gæti útlagst á íslensku: „Einu raunverulegu mistökin eru að hætta að reyna. Floppaðu því fljótt. Lærðu hratt. Og byrjaðu aftur.“

Í þáttaröðinni „Eitthvað annað“ hafa þau Lóa Pind Aldísardóttir þáttagerðarmaður og Egill Aðalsteinsson myndatökumaður, fylgst með frumkvöðlum af margvíslegum toga. Fólki sem er tilbúið að leggja af stað út í óvissuna til að láta viðskiptahugmynd sína rætast.

Við fylgjumst með heljarstökkinu sem þeir Dri-bræður fóru í með viðskiptahugmynd sína í 6. þætti sem verður á dagskrá Stöðvar 2 í kvöld, kl. 19:20.