Risagróðurhús gætu risið næsta haust

Mögulegt væri að hefja framleiðslu í risagróðurhúsum við Grindavík næsta haust, ef allt gengur að óskum. Þetta segir Kristján Eysteinsson, starfsmaður hollenska fyrirtækisins EsBro og umsjónarmaður verkefnisins, á vef Viðskiptablaðsins.

Búið er að færa byggingarstað gróðurhúsanna lengra frá bænum en fyrst var áætlað og er núna stefnt á að reisa húsin í Mölvík um tíu kílómetra fyrir utan bæinn. Kristján segir að rækta eigi tómata og öll framleiðslan verði flutt til Evrópu.

„Ég er bjartsýnn á að það takist að koma upp gróðurhúsi af þessari stærð hér," er haft eftir Kristjáni í Viðskiptablaðinu. Hann segir að heildarkostnaðurinn við verkefnið sé áætlaður um 35 til 40 milljón evrur eða 5,5 til 6,3 milljarðar króna.

Þá segir hann að ef allt gangi að óskum verði hægt að hefja framleiðslu næsta haust. Það sé þó háð því að hægt verði að ganga frá öllum samningum. Einnig er sagt frá því að bæjarstjóri Grindavíkur telji að heildartekjur bæjarins vegna uppbyggingarinnar gætu orðið á bilinu 50 til 70 milljónir króna á ári.