MP banki selur hlut sinn í Gamma

MP banki hefur selt 26,8% hlut sinn í rekstrarfélaginu GAM Management, GAMMA, til nokkurra annarra hluthafa Gamma, nýs hluthafa úr hópi núverandi starfsmanna og félagsins sjálfs.

„Salan er liður í að einfalda eignasafn bankans. Rekstur félagsins er góður og uppbygging þess hefur gengið vel. Við óskum eigendum og starfsmönnum GAMMA velfarnaðar við áframhaldandi uppbyggingu félagsins,“ segir Sigurður Atli Jónsson, forstjóri MP banka í tilkynningu.

,,Kaupin á eignarhlut MP banka eru mjög jákvæð fyrir Gamma og styrkja sérstöðu félagsins sem óháðs fjármálafyrirtækis. Vöxtur félagsins hefur verið mikill á síðustu árum og reksturinn góður. Við horfum björtum augum fram á veginn og þökkum MP banka fyrir samstarfið í gegnum árin,“ segir Gísli Hauksson forstjóri Gamma.

Gamma er rekstrarfélag verðbréfasjóða sem, þeir Gísli Hauksson hagfræðingur og Agnar Tómas Möller verkfræðingur stofnuðu á miðju ári 2008. Starfsmenn Gamma voru fyrir kaupin meirihlutaeigendur félagsins. Söluverð hlutarins er trúnaðarmál.