Raforkuverð hækkar

Heildar raforkukostnaður hjá heimilum landsins hefur hækkað frá því í ágúst 2013, sé miðað við 4000 kílóvattstunda notkun á ári. Mest hefur raforkukostnaðurinn hækkað hjá viðskiptavinum Rarik dreifbýli/Orkusalan eða um 6,6%. Rafveita Reyðarfjarðar hefur hækkað um 2,8% og Orkuveita Reykjavíkur/Orka Náttúrunnar um 1,3%.

Verð á raforkunni hefur hækkað hjá öllum raforkusölum að lágmarki um 0,08% en Rafveita Reyðarfjarðar hefur hækkað mest, um 2,47%. Skattur á raforkusölu, umhverfis – og auðlindaskatturinn var hækkaður um 0,04 á hverja kílóvattstund um áramótin.

Raforkureikningi heimilis má skipta í tvo hluta. Greitt er fyrir flutning og dreifingu raforkunnar og svo fyrir roforkuna sjálfa. Salan er aðskilin og sem dæmi getur heimili á Ísafirði valið á milli raforkusala en kaupir ávallt flutning og dreifingu af Orkubúi Vestfjarða. 

Þetta kemur fram í úttekt sem Alþýðusamband Íslands gerði á raforkukostnaði.