Fór í fyrstu veiðiferðina eftir breytingar

Áhöfnin á Helgu Maríu AK fór í sína fyrstu veiðiferð um helgina eftir að togaranum var breytt úr frystitogara í ísfisktogara. Frá þessu er greint á vef HB Granda.   

Skipinu var breytt í skipasmíðastöð í Gdansk í Póllandi og það kom aftur til landsins í lok nóvember síðastliðnum. Ein af ástæðunum fyrir breytingunum er sú að stjórn HB Granda ákvað að leggja aukna áherslu á landvinnslu botnfisks og draga úr sjófrystingu.

Togarinn, sem hét áður Haraldur Kristjánsson HF og er í eigu HB Granda, kom hingað til lands fyrir um 25 árum síðan ásamt systurskipinu Sjóla HF. Þau voru á þeim tíma í hópi fyrstu frystitogara sem voru smíðaðir fyrir Íslendinga.