Almenningur fái skattaafslátt fyrir að fjárfesta í nýsköpun

Auðvelda þarf almenningi að fjárfesta í nýsköpunarfyrirtækjum. Þetta segir einn af stofnendum íslenska nýsköpunarfyrirtækisins Nox Medical. Þingmaður Framsóknarflokks vill rýmka heimildir lífeyrissjóða til að fjárfesta í nýsköpunarfyrirtækjum.

Skortur er á fjárfestingu í nýsköpunarfyrirtækjum á Íslandi og verða mörg fyrirtæki undir í baráttunni um fjárfestingu. Sveinbjörn Höskuldsson, einn af stofendum nýsköpunarfyrirtækisins Nox Medical, kallar eftir því að almenningi verði veittur skattaafláttur fyrir að kaupa hlutabréf í íslenskum nýsköpunarfyrirtækjum.

„Það er klárlega eitthvað að fjárfestingarumhverfinu á Íslandi. Það þarf að auðvelda verulega almenningi að fjárfesta í sprotafyrirtækjum, jafnvel með skattaafslætti líkt og var veittur á tíunda áratugnum,“ segir Sveinbjörn.

Lífeyrissjóðirnir taki þátt

Frosti Sigurjónsson, formaður efnahags- og viðskiptanefndar, tekur undir með Sveinbirni. Hann telur að fjárfesting af hálfu almennings og sérstaklega lífeyrissjóða geti breytt miklu fyrir nýsköpun á Íslandi.

„Ég held að það sé mjög mikilvægt að við veltum fyrir okkur þeirri spurningu hvort að lífeyrissjóðirnir, sem fjárfesta 100 - 120 milljarða á ári, afhverju þeir fjárfesta ekkert í nýsköpun. Það er mikilvægt að lífeyrissjóðir setji líka niður kartöflur til að byggja upp öflugt hagkerfi. Það er öllum lífeyrisþegum í hag,“ segir Frosti.

Hann gerir fastlega ráð fyrir því að stuðningur sé innan ríkisstjórnarinnar með að koma málinu í framkvæmd fyrir þinglok.

„Ef að lífeyrissjóðir myndu setja, þó ekki nema eitt prósent - 1,2 milljarða á ári í fjárfestingu í nýsköpunarsjóð - þá geta þeir tekið þátt í því að byggja upp mjög öflugt hagkerfi og myndu ávaxta fé sitt mjög vel að mínu mati,“ bætir Frosti við.

Málið er nú í höndum Bjarna Benediktssonar, fjármála- og efnahagsráðherra. Starfshópur sem fjallaði um málið skilaði skýrslu til ráðherra seint á síðasta ári. Ráðherra stefnir að því að leggja fram frumvarp fyrir Alþingi á næstu mánuðum þar sem almenningi verði veittur skattaafsláttur fyrir að fjárfesta í nýsköpunarfyrirtækjum.