Verðlækkun á nýjum bílum gæti lækkað lán um milljarða

Benedikt Eyjólfsson, forstjóri Bílabúðar Benna, segir að bílaumboðin hefðu frekar átt að lækka verð en að bjóða vaxtalaus lán. Ef öll bílaumboðin hefðu farið þá leið að lækka verð á nýjum bílum um til dæmis 3 prósent, segir Benedikt að vísitalan hefði lækkað um 0,17 prósent.

Það hefði aftur skilað sér í því að öll verðtryggð lán gætu lækkað um einn til tvo milljarða króna samkvæmt tilkynningu frá umboðinu.

Bílabúð Benna fór aðrar leiðir en að bjóða upp vaxtalaus lán og tilkynnti um allt að sjö prósent lækkun á nýjum bílum. Þannig eru dæmi um að bílar hafi lækkað um allt að 500 þúsund krónur.

„Við höfum ávallt talið að það komi neytendum best að fá verðlækkanir strax, þegar hagstæðara gengi gefur svigrúm til þess, einsog við gerðum síðastliðið vor. Við viljum því meina að öll bílaumboðin hefðu átt að fara þessa leið núna,” segir Benedikt.

Samkvæmt upplýsingum frá Hagstofu vega bílar 5,6% í vísitölunni. Ef öll bílaumboðin hefðu lækkað verð á nýjum bílum um t.d.  3%,  myndi vísitalan lækka um 0,17%, sem aftur skilaði sér í því að öll verðtryggð lán gætu lækkað um 1-2 milljarða. Þjóðhagslegt hagræði af þessa er því ótvírætt og má halda til haga með hliðsjón af þeirri vegferð sem ASÍ og Samtök atvinnulífsins  hafa lagt upp í saman.