Yfirlýsing frá Nóa Siríus vegna verðbreytinga

Nói Siríus hefur sent frá sér yfirlýsingu vegna verðhækkana sinna.

Fyrirtækið segir að vegna mikilla hækkana á framleiðslukostnaði og einkum hráefnisverði undanfarin misseri, um tugi prósenta í sumum tilvikum, sé óhjákvæmilegt að Nói Síríus hækki listaverð.

Mun verð á framleiðsluvörum fyrirtækisins hækka á bilinu 2,5 – 9% frá og með 22. janúar næstkomandi.

Nói segir það ekki auðvelda ákvörðun að hækka verð í því samkeppnisumhverfi sem Nói Síríus starfar og það gerir enginn nema að ríkar ástæður búi að baki. Bakgrunnur þessara hækkana sé fyrst og fremst nær stöðugar hækkanir á helstu hráefnum til súkkulaðigerðar á heimsvísu og leitt hefur til hækkunar á súkkulaði víða um heim. Sem dæmi megi nefna að verð á einu helsta hráefni til framleiðslunnar hefur hækkað um helming á einu ári.

Í tilkynningunni segir: „Nói Síríus hefur gert sitt besta til að halda aftur af hækkunum þrátt fyrir kostnaðarhækkanir og meðal annars farið í gegnum viðamiklar aðgerðir til að straumlínulaga reksturinn undanfarin ár. En það eru takmörk fyrir því hverju hægt er að ná fram með slíkum aðgerðum og ekki eru aðrar leiðir færar nú en að hækka verð ef ekki á að fara illa. Hjá fyrirtækinu starfa um 150 manns og án hækkana væri vegið að rekstrargrundvelli þess og um leið starfsgrundvelli starfsfólksins. Ef ekki væru þessar sérstöku aðstæður hefði Nói Síríus auðvitað gert sitt ítrasta til að láta umsamdar launahækkanir í nýgerðum kjarasamningum ekki hafa áhrif á verðlagningu fyrirtækisins.“