Misjöfn viðbrögð bílaumboða við lánakjörum BL

Hin bílaumboðin ætla að bregðast við nýrri leið BL við fjármögnun bílakaupa viðskiptavina sinna. BL hyggst bjóða vaxta- og kostnaðarlaus lán til kaupa á nýjum bílum sem sum umboðin telja örvæntingu en önnur hyggjast gera slíkt hið sama.

„Við höfum engin áform uppi um að gefa peninga með þessum hætti, þetta er einhver örvænting held ég. Framlegð nýrra bíla er það lág, örfá prósent og menn bara gefa hana alla með svona löguðu,“ segir Björn Snædal Hólmsteinsson, fjármálastjóri bílaumboðsins Heklu, aðspurður um hvort umboðið hyggist feta í fótspor BL.

Lán BL geta að hámarki numið 40 prósentum af andvirði nýs bíls. Þannig sparast 280 þúsund krónur á þremur árum sem annars hefðu farið í vexti og kostnað, ef nýja bifreiðin kostar 3,9 milljónir.

„Þetta er frekar örvænting eða trix af því þeir sem þurfa lán fyrir bílakaupum þurfa yfirleitt hærra lán en 40 prósent og ég skil ekki hver á að kaupa þetta nema einhverjir örfáir,“ segir Björn Snædal.

Loftur Ágústsson, markaðsstjóri BL, sagði í samtali við Fréttablaðið á þriðjudag að liðka þurfi til svo venjulegt fólk geti nýtt sér þá kosti sem nýir bílar hafa umfram gamla bíla.

Björn Snædal segir að þessi lán séu ekki fyrir venjulegt fólk eins og lagt er upp með af BL heldur þurfi fólk að eiga fyrir 60 prósentum af verði bílsins. „Þeir selja lánin sem kostar þó nokkuð margar prósentur og síðan fara lánin þannig í gegnum annan aðila sem þarf að samþykkja lántakann og fleira sem þýðir að auðvitað getur ekki hver sem er fengið lánað,“ segir Björn.

Hann segir Heklu ekki munu veita lán til bílakaupa með þessum hætti. „Ég skil ekki að ætla að gefa vextina. Þetta er bara rugl,“ segir Björn Snædal að lokum.

Toyota hyggst hins vegar fylgja í fótspor BL.

„Við munum bjóða upp á sambærilega vöru,“ sagði Páll Þorsteinsson, upplýsingafulltrúi Toyota, í samtali við Fréttablaðið. Nákvæmlega hvað Toyota hyggst bjóða upp á vildi hann ekki gefa upp en það mun verða kynnt á bílasýningu þeirra um helgina.

Björn Guðmundsson, markaðsstjóri Öskju, segir að þar sé verið að skoða þessi mál. „Þetta þarf allt að skoðast í samstarfi við lánafyrirtækin og við vitum ekki hvaða samning BL er með við lánafyrirtækið. En ef þetta er eitthvað sem markaðurinn vill þá munum við skoða þetta,“ segir Björn.

Hann tekur í sama streng og Björn Snædal varðandi fyrir hverja lánin henta. „Þetta hentar alveg klárlega ekki öllum, þú þarft engu að síður að eiga 60 prósent af listaverðinu annaðhvort í öðrum bíl eða peningum. Eftirstöðvunum er svo skipt upp á 36 mánuði sem er mjög stíft. En þetta hentar örugglega fólki sem á eitthvert eigið fé og getur ráðið við þessa stífu endurgreiðslu, sem er auðvitað gott upp á eignamyndun. Það er alltaf betra að geta greitt niður lán hraðar en hægar,“ segir Björn.

Hann segir Öskju skoða þetta mál með opnum hug og þau útiloki ekki að fara sömu leið og BL.