Laun hækkuðu um 0,9% frá fyrri ársfjórðungi

Samkvæmt vísitölu launa voru regluleg laun að meðaltali 0,9% hærri á fjórða ársfjórðungi 2013 en á ársfjórðungnum á undan.

Frá fyrra ári hækkuðu laun um 6,0% að meðaltali, hækkunin var 6,1% á almennum vinnumarkaði og 5,5% hjá opinberum starfsmönnum. Þar af hækkuðu laun ríkisstarfsmanna um 6,1% en hjá starfsmönnum sveitarfélaga um 4,9%. Þetta kemur fram á vefsíðu Hagstofunnar.

Þar segir að frá fyrri ársfjórðungi mældist hækkun reglulegra launa mest í byggingarstarfsemi eða um 1,4%. Þá hækkuðu laun milli ársfjórðunga um 1,1% í samgöngum, 1,0% í verslun og í fjármálaþjónustu og 0,9% í iðnaði. Frá fyrra ári hækkuðu laun mest í samgöngum eða um 7,3% en minnst í iðnaði eða um 5,6%.

Frá fyrri ársfjórðungi var hækkun reglulegra launa eftir starfsstéttum á bilinu 0,6% til 1,4%. Laun verkafólks hækkuðu mest en laun iðnaðarmanna hækkuðu minnst. Frá fyrra ári hækkuðu laun skrifstofufólks mest eða um 7,8% en laun stjórnenda hækkuðu minnst eða um 5,1%. Á sama tíma hækkuðu regluleg laun tækna um 6,7%, sérfræðinga um 6,5%, þjónustu-, sölu- og afgreiðslufólks um 6,2%, verkafólks um 6,1% og iðnaðarmanna um 5,5%.

Stéttarfélög á almennum vinnumarkaði undirrituðu nýjan kjarasamning í desember á síðasta ári. Kjarasamningurinn tók gildi 1. janúar 2014 og var hann gerður til tólf mánaða. Þá hækkuðu laun um 2,8% eða að minnsta kosti 8 þúsund krónur á mánuði fyrir fullt starf.