Fjallið fékk sér flúr

Kraftajötuninn Hafþór Júlíus Björnsson var meðal fjölmargra gesta á íslensku tattúráðstefnunni sem fór fram á Bar 11 um helgina.

Hafþór fékk sér tvö húðflúr, annars vegar tilvitnun í kraftakarlinn Jón Pál Sigmarsson heitinn framan á sköflunginn og hins vegar mynd af Marilyn Monroe á kálfann.

Fjölmargir erlendir húðflúrlistamenn voru á ráðstefnunni að sýna listir sínar og ráku margir upp stór augu þegar Hafþór mætti á staðinn enda hefur hann náð heimsathygli eftir frammistöðu sína sem Sir Gregor Clegane, eða Fjallið, í sjónvarpsþáttunum Game of Thrones.