Nýir stjórnendur ráðnir til Meniga

Til að mæta örum vexti og auknum alþjóðlegum verkefnum hefur Meniga ráðið til sín tvo nýja lykilstjórnendur; þá Björgvin Inga Ólafsson sem fjármálastjóra og Jóhann Braga Fjalldal sem framkvæmdastjóra viðskiptaþróunar.

Lausnir Meniga eru nú í notkun hjá um 20 fjármálastofnunum í 14 löndum.

„Við hjá Meniga erum gríðarlega ánægð að fá þá Björgvin Inga og Braga til liðs við okkur. Alþjóðleg viðskiptareynsla þeirra og menntun mun nýtast Meniga vel til að takast á við verkefnin sem framundan eru,“ segir Georg Lúðvíksson, forstjóri og stofnandi Meniga.

„Það er morgunljóst að hinn vaski hópur starfsmanna félagsins hefur einsett sér að vinna saman að farsællri vöruþróun og áframhaldandi landvinningum, hluthöfum og viðskiptavinum til heilla. Verður frábært að taka þátt í því,“ segir Björgvin Ingi Ólafsson, fjármálastjóri Meniga.

„Það eru spennandi tímar framundar hjá Meniga. Ég hlakka til að taka þátt í að efla enn frekar þróunarstarf félagsins og styrkja stöðu þess á alþjóðlegum mörkuðum,“ segir Bragi Fjalldal, framkvæmdastjóri viðskiptaþróunar Meniga.

Björgvin Ingi Ólafsson er fæddur árið 1978. Björgvin Ingi kemur til starfa hjá Meniga frá ráðgjafarfyrirtækinu McKinsey & Company, en hann starfaði áður í um áratug á íslenskum fjármálamarkaði. Björgvin Ingi er með MBA gráðu frá Kellogg School of Management og B.Sc. gráðu í hagfræði frá Háskóla Íslands. 

Jóhann Bragi Fjalldal er fæddur 1974. Undanfarin 4 ár hefur Bragi gegnt stöðu framkvæmdastjóra hjá danska vindorkufyrirtækinu Vestas Wind Systems. Hann starfaði áður um árabil hjá bandaríska ráðgjafafyrirtækinu Bain & Company. Bragi er með MBA gráðu frá IMD í Sviss, MSc í tölvunarfræði frá Háskólanum í Sussex og BSc í tölvunarfræði frá Háskólanum í Árósum.