Offramboð á eldsneytisstöðvum í þéttbýli

Þrisvar sinnum fleiri eldsneytisstöðvar eru á Íslandi en í nágrannaþjóðum og í Bandaríkjunum. Undarleg þróun segir framkvæmdastjóri Félags íslenskra bifreiðaeigenda og segir neytendur borga hærra eldsneytisverð fyrir vikið.

„Þetta er hæsta hlutfall sem þekkist í vestrænum heimi. Það eru of margar bensínstöðvar. Ef menn ætla að hagræða þá ætti að vera hægt að fækka stöðvum,“ segir Runólfur.

Þrettánda stöðin væntanleg á Akureyri

Það er ekki bara á höfuðborgarsvæðinu þar sem finna má fjölda eldsneytisstöðva. Greint var frá því í Akureyri Vikublað fyrir skömmu að þrettánda eldsneytisstöðin væri í burðarliðnum á Akureyri sem er heldur ríflegt fyrir 18 þúsund manna bæjarfélag. Runólfur telur að kostnaðurinn við þennan fjölda eldsneytisstöðva endi hjá neytendum.

„Það þarf að halda þessu úti og það er kostnaður sem endar hjá neytendum. Það er alveg ljóst að ef það væri hægt að fækka stöðvum þá myndi kostnaðurinn skila sér tilbaka til neytenda miðað við eðlilega samkeppni,“ segir Runólfur.

Hversu mikill hluti eldsneytisverðsins er tilkominn vegna þessa?

„Þegar verðlagseftirlitið fylgdist með þessu þá var gert ráð fyrir því að 7-8% færi í rekstur og viðhald bensínstöðva. Það skiptir máli að geta haft þennan kostnað í lágmarki,“ segir Runólfur.

74 eldsneytisstöðvar eru á höfuðborgarsvæðinu og hefur fjölgað mikið á síðustu árum. Það er öfug þróun við það sem á sér stað t.a.m. í Danmörku þar sem eldsneytisstöðvum hefur fækkað. Runólfur telur að offramboð eldsenytisstöðva sýni sig best í því að það sé gott sem aldrei biðröð eftir dælu.

Nánar í myndbandinu hér að ofan