Landsbankinn segir frétt Reuters ranga

Hagfræðideild Landsbankans segir að frétt Reuters (Thomson Reuters, TR) um meinta erfiðleika Íslands á alþjóðlegum lánamörkuðum sé röng. Þar heldur blaðamaður því fram að vextir á fimm ára skuldabréfi ríkissjóðs hafi, frá því ný ríkisstjórn tók við, hækkað úr 4,1 prósenti í 6,4 prósent.

„Við nánari athugun kemur í ljós að blaðamaður er að fjalla um þróun ávöxtunarkröfu á ríkisskuldabréfum í krónum en ekki erlendri mynt eins og látið er liggja að í fréttinni. Engu að síður standast útreikningar TR ekki nánari skoðun,“ segir í Vikubyrjun Landsbankans.

Þar má sjá mynd sem sýnir þróun á ávöxtunarkröfu íslensks ríkisskuldabréfs í krónum á gjalddaga 2016, sambærilegs bréfs á gjalddaga 2019 og fimm ára ávöxtunarkröfu ríkisins eins og hún birtist í upplýsingakerfi TR.

„Eins og sést þá virðist sem viðmiðunarbréf upplýsingakerfis Thomson Reuters breytist í mars, þannig að höfundur fréttarinnar er að bera saman ávöxtunarkröfu mismunandi bréfa með mismunandi gjalddaga, sem er engan vegin rétt aðferðafræði. Einnig virðist sem TR noti dagsetningu í byrjun mars sem fyrri viðmiðunarpunkt, tveimur mánuðum áður en núverandi ríkisstjórn tók við, en miklar sviptingar áttu sér stað rétt í kjölfarið af ástæðum sem hafa lítið með efni fréttarinnar að gera. Að lokum verður það að teljast mjög sérstakt að ræða um ávöxtunarkröfu skuldabréfa í íslenskum krónum sem er læst bak við gjaldeyrishöft í frétt um aðgengi Íslands að erlendum lánamörkuðum, í stað þess að skoða kröfu á erlendu skuldabréfi ríkissjóðs.“