Aliexpress rúmlega fimmtíufaldaði sölu sína milli ára

Verslun notenda Meniga við erlendar vefverslanir óx mikið á síðasta ári. Þar trónir Amazon á toppnum með 76% markaðshlutdeild og jukust viðskipti Meniganotenda við fyrirtækið um 6% á milli ára.

Samkvæmt mola sem gefinn hefur verið út af Meniga og Stofnunar um fjármálalæsi er hástökkvari ársins í vefverslun Íslendinga Aliexpress sem rúmlega fimmtíufaldaði sölu sína milli ára. Árið 2013 var hlutdeild fyrirtækisins í heildarveltu vefverslunar orðin 13% en árið áður var hún langt innan við eitt prósentustig.

Breki Karlsson, forstöðumaður Stofnunar um fjármálalæsi, segir í molanum að fólk virðist hafa tekið ástfóstri við Aliexpress, en verslun við þann vef nálgaðist að vera um helmingur af verslun Amazon í nóvember og var fjórðungur í desember.

Velta Asos jókst einnig mikið, eða um 74% milli ára. Velta Target og Ebay minnkaði hins vegar um 15%.

Á heildina jukust vefviðskipti Meniganotenda við þessar 7 stærstu vefverslanir um 23% milli ára.

Nærri þriðjungur Meniganotenda keypti vörur á netinu á nýliðinu ári, þeim sem versluðu á netinu við eina eða fleiri af sjö vinsælustu erlendu netverslununum fjölgaði um 34% milli ára.

Vinsælustu vefverslanirnar eru Amazon, Aliexpress, Asos, ShopUSA, Target, Dealextreme og Ebay.

Menigamola Bjarka má lesa í heild sinni hér.