Advania skoðar byggingu nýs gagnavers

Bygging nýs tvö þúsund fermetra gagnavers er til skoðunar innan Advania. Heildarfjárfesting verkefnisins gæti numið tveimur til þremur milljörðum króna og fyrirtækið skoðar nú nokkrar lóðir sem koma til greina. Advania á og rekur gagnaverið Thor Data Center í Hafnarfirði og fyrirtækið gæti á endanum ákveðið að fara einungis í stækkun á því.

„Eftirspurnin eftir hýsingu hefur á undanförnum mánuðum verið mun meiri en okkar áætlanir gerðu ráð fyrir. Þar með stöndum við frammi fyrir því að ákveða, mun fyrr en áætlanir gerðu ráð fyrir, með hvaða hætti við stækkum. Ástæða þess að við erum að skoða fleiri valmöguleika en núverandi staðsetningu eru takmarkaðir möguleikar til orkuafhendingar innan þess tímaramma sem við erum að horfa til," segir Eyjólfur Magnús Kristinsson, framkvæmdastjóri hjá Advania og formaður Samtaka íslenskra gagnavera.

Thor Data Center er tvö þúsund fermetrar að stærð og gagnaverið kaupir orku af HS Orku. Um 80 alþjóðleg fyrirtæki nýta sér þjónustu Thor og geyma þar hugbúnað, hugbúnaðarkerfi og jafnvel heil tölvukerfi. Stærsti einstaki viðskiptavinurinn er norska hugbúnaðarfyrirtækið Opera Software.

„Við höfum byggt gagnaverið upp í áföngum. Við verðum hins vegar búin að fullnýta húsnæðið þegar við tökum í notkun fimmta og síðasta áfangann um næstu mánaðamót. Húsnæðið er með pláss fyrir 2,5 megavött af orku eins og það er núna og við höfum nú þegar notað tvö megavött og ég geri ráð fyrir að gagnaverið verði orðið fullt í haust."

Viðskiptavinum íslensku gagnaveranna, Thor Data Center og Verne Global á Ásbrú í Reykjanesbæ, fjölgaði mikið á síðasta ári.

„Þessi gagnaver voru lengi af stað og menn hálfhlógu að okkur í byrjun þegar við keyptum Thor-gagnaverið. Verne Global var einnig með tóm gagnaver í nokkur ár. Nú er svo komið að þau fyrirtæki sem eru með hýsingu hjá okkur nota meiri internetumferð en öll heimili og fyrirtæki í landinu samanlagt," segir Eyjólfur.