Skapandi greinar meðal stoða Austurlands

Skýr niðurstaða vinnustofu um stefnumótun skapandi greina á Austurlandi að skapandi greinar séu og eigi að vera ein af stoðum landhlutans. Þegar hafi ákveðið forskot skapast þar vegna MAKE by Þorpið og Evrópuverkefnisins Creative communities og brýnt sé að nýta það forskot.

Í tilkynningu frá Austurbrú segir að tæplega 40 manns hafi tekið þátt í vinnustofunni sem haldin var í gær, þrátt fyrir að veður og færð hafi sett strik í reikninginn.

Ingibjörg Gréta Gísladóttir, framkvæmdastjóri Reykjavík Runway og fyrrverandi framkvæmdastjóri Hugmyndahúss háskólanna leiddi fundinn sem hafði það verkefni að leggja drög að stefnu til ársins 2020 fyrir skapandi greinar á Austurlandi auk þess að skoða hvernig verkfærið MAKE by Þorpið gæti nýst í skapandi greinum til framtíðar.

„Næstu skref eru að vinna úr öllum þeim upplýsingum og tillögum sem þarna komu fram. Að líkindum munum við efna til nokkurra vinnufunda í smærri hópum, áður en við leggjum fram í stefnu í skapandi greinum fyrir Austurland til ársins 2020,“ segir Lára Vilbergsdóttir, verkefnisstjóri skapandi greina hjá Austurbrú í tilkynningunni.

Hún segir einnig að vinnustofan hafi verið einkar gagnleg og að spennandi tímar séu framundan í þessum geira á Austurlandi.