Erlend staða þjóðarbúsins ekki betri frá aldarmótum

Erlend staða þjóðarbúsins var hagstæðari um síðustu áramót en hún hefur verið frá aldarmótum, samkvæmt tölum frá Seðlabankanum. Frá því um mitt síðasta ár hefur staðan batnað um 12 prósent af vergri landsframleiðslu, sem samsvarar bata upp á um það bil 215 milljarða króna.

Þetta kemur fram í frétt frá Greiningu Íslandsbanka.

Í fréttinni segir að staðan virðist í grófum dráttum vera sjálfbær, þó enn sé talsverð óvissa um endanlega útkomu úr uppgjörum gömlu bankanna  og fleiri fyrirtækja  í slitameðferð.

Í nýju mati Seðlabankans, sem birt var í gær, má sjá að erlenda staða þjóðarbúsins er neikvæð um 12 prósent vergri landsframleiðslu, eða 214 milljarða króna, ef gömlu bankarnir séu undanskildir. Hlutfall innlendra eigna þeirra er mun hærra en hlutfall krafna frá innlendum kröfuhöfum og því mun uppgjör þeirra væntanlega hafa talsverð neikvæð áhrif á erlendu stöðuna.

Seðlabankinn metur það svo að séu gömlu bankarnir teknir inn í reikninginn muni það rýra stöðu þjóðarbúsins um 44 prósent af VLF, eða 787 milljarða króna. Slit annarra fyrirtækja mun aftur á móti hafa jákvæð áhrif um þrjú prósent.

Því er niðurstaðan að undirliggjandi erlend staða þjóðarbúsins var neikvæð um 53 prósent af VFL, eða 950 milljarða króna, í árslok. „Ef mat bankans á við rök að styðjast er hér um hagstæðustu erlendu stöðu þjóðarbúsins að ræða síðan á 1. ársfjórðungi 2000, en þá var hrein erlend staða þjóðarbúsins neikvæð um 49% af VLF,“ segir í frétt Íslandsbanka.