PFS óskar eftir samráði hagsmunaaðila

Póst- og fjarskiptastofnun (PFS) hefur kallað eftir samráði við hagsmunaaðila vegna fyrirhugaðrar ákvörðunar stofnunarinnar um að heimila Vodafone og Nova samnýtingu á tíðnum sem félögunum hefur verið úthlutað.

Félögin tvö stefna að stofnun nýs rekstrarfélags sem verður í jafnri eigu þeirra. Nýja félagið á að sjá um uppbyggingu, eignarhald og þróun dreifikerfis fyrir alla almenna farsímaþjónustu Vodafone og Nova og sameina núverandi kerfi félaganna í eitt alhliða farsímadreifikerfi.

Frá þessu er greint í frétt á vef PFS þar sem segir að stofnunin ætli að veita samþykki sitt fyrir fyrirhugaðri samnýtingu. Það verði hins vegar ekki gert fyrr en áhugasamir hagsmunaaðilar hafi skilað inn umsögnum.

PFS tekur fram að samráðið taki eingöngu til samnýtingar tíðna en ekki samkeppnislegra áhrifa sem af samstarfinu kunni að stafa. Því eigi hagsmunaaðilar sem vilji tjá sig um slík áhrif samstarfsins að beina þeim til Samkeppniseftirlitsins.