Landsbankinn hagnast um 28,8 milljarða

Hagnaður Landsbankans nam 28,8 milljörðum króna eftir skatta á árinu 2013 samanborið við 25,5 milljarða króna á árinu 2012. Það er aukning um 13 prósent milli ára. 

Í tilkynningu bankans um ársuppgjör 2013 segir að aukningin skýrist einkum af hærri þjónustutekjum, virðisbreytingum lána og hlutabréfa auk lækkunar á kostnaði.

Eigið fé bankans nam í lok árs 2013 um 241,4 milljörðum króna. Það hefur hækkað um 7 prósent frá áramótum 2012 þrátt fyrir 10 milljarða króna arðgreiðslu á árinu. Heildareignir bankans námu 1.152 milljörðum í lok árs 2013, hreinar vaxtatekjur námu 34,3 milljörðum króna og þjónustutekjur 5,3 milljörðum.

Steinþór Pálsson, bankastjóri Landsbankans, segir í tilkynningunni að afkoma bankans sé góð og að hún sýni traustan rekstur á öllum sviðum. 

„Tekjur bankans fara hækkandi og á sama tíma hefur verið dregið verulega úr rekstrarkostnaði. Arðsemi eigin fjár er ágæt þrátt fyrir hátt eiginfjárhlutfall. Vegna traustrar lausafjárstöðu í erlendri mynt greiddi bankinn annað árið í röð stóra fjárhæð inn á skuld sína við LBI hf. Þá greiddi Landsbankinn um 10 milljarða króna í arð á árinu og bankaráð hefur samþykkt að leggja til við aðalfund bankans að greiddur verði 20 milljarða króna arður vegna reksturs ársins 2013. Hagur eigenda, þar með ríkissjóðs sem stærsta eiganda, af góðum rekstri bankans blasir því við,“ segir Steinþór.

Hann segir íþyngjandi skatta hafa verið lagða á fjármálafyrirtæki og að á árinu 2013 hafi reiknaðir skattar Landsbankans hækkað um 8,2 milljarð króna miðað við árið á undan og nemi nú 12,3 milljörðum. „Augljóst er að svo þungir skattar kunna að hafa áhrif á kjör til viðskiptavina til lengri tíma,“ segir Steinþór.