Gunnar Leó ráðinn framkvæmdastjóri DK hugbúnaðar

Gunnar Leó Gunnarsson hefur verið ráðinn framkvæmdastjóri DK hugbúnaðar ehf. Hann er með BS gráðu í tölvunarfræði frá Háskóla Íslands og MBA frá alþjóðlega viðskiptaháskólanum ISG í París, samkvæmt fréttatilkynningu.

Þar segir að Gunnar hafi víðtæka reynslu í upplýsingatækni en hann starfaði um árabil hjá Tæknivali, Kerfi og OZ. Þá var hann framkvæmdastjóri Eskils og sérfræðingur í fyrirtækjaráðgjöf hjá Landsbanka Íslands. Hann var einnig forstjóri hjá fjárfestingafélaginu Nordic Partners og leiddi fjárfestingar þess. Undanfarið hefur hann starfað sjálfstætt við ráðgjöf í upplýsingatækni, stjórnun og rekstri. Á síðasta ári stofnaði Gunnar Leó ásamt öðrum fyrirtækið Blueprint ehf. sem sérhæfir sig í viðskiptagreind og áætlanagerð.

DK hugbúnaður ehf. var stofnað árið 1998 og framleiðir fyrirtækið íslenskan viðskiptahugbúnað. Viðskiptavinir DK eru ríflega 4.000 fyrirtæki í öllum helstu atvinnugreinum. Hjá DK starfa 40 starfsmenn á Akureyri og í Reykjavík, þar sem starfsstöð fyrirtækisins var nýlega flutt í hús Orkuveitunnar að Bæjarhálsi 1.