Kjartan Atli hættur hjá Stjörnunni

„Ég hef ákveðið að hætta að leika með meistaraflokki Stjörnunnar,“ sagði körfuboltamaðurinn Kjartan Atli Kjartansson í viðtali sem birtist á heimasíðu Stjörnunnar.

Kjartan Atli, sem er 29 ára gamall, hefur spilað með Stjörnunni lengst af á ferlinum en hefur einnig verið á mála hjá FSu, Hamri og Haukum.

Meðfylgjandi viðtal var birt á heimasíðu Stjörnunnar en hann var einnig gestur í nýjasta hlaðvarpsþætti NBA Íslands þar sem hann fór ítarlega yfir ferilinn og uppgang körfuboltans í Garðabæ.

Kjartan Atli ætlar nú að einbeita sér að þjálfun en hann hefur starfað með yngri flokkum Stjörnunnar undanfarin ár.